A Ferly Thyng It Is To Mene Lyrics

A ferly thyng it is to mene,
That a mayd a chyld have borne,
And syth was a mayden clene
As prophetes sayden herbeforne.
I-wys it was a wonder thyng,
That, thowrow an aungelles gretyng,
God wold ly3t in a mayden 3yng,
Wyth aye,
Aye, aye, I dar well say,
Her maydenhed 3ede no away.

Hys moder was a mayden myld,
As holy kyrke wytnese and we;
Withouten weme sche bar a chyld,
And so ded never non but she.
A farly thyng it schuld befall,
But god hath all women thrall
In peynes to ber her chylderne all,
With aye,
Aye, aye, I dar well say,
She felt non of that aray.

Hys byrth was know that ylk ny3gh
In all the lond thorow and thorow;
Thedyr thei 3odyn to se that sy3th,
To Bethlem that fayer borow.
An angell bad that thei shuld go;
He seyd that betwene beestys two
Godes sonne seker 3e fynd so,
With aye,
Aye, aye, I dar well say,
In a crybe thei found hym ther he lay.

Thre kynges ou3of Ynde lond,
Thei cum to seke that ferly fode,
With rych presants in ther hond;
A sterre styffely afore hem 3ode.
A ferly thyng it was to se,
That sterre was mor than other thre,
Yt held the course to that contree,
With aye,
Aye, aye, I dar well say,
Thei ded not mysse of redy way.

Whan thei with that lady mett,
Thei fond hyr chyld upon her kne;
Full curttesly thei her grett,
And present hym with 3eftys thre.
As kyng thei 3effe hymn gold to redd;
Myrre and sense to hys manhedd;
Of hyr offryng thus we redde,
With aye,
Aye, aye, I dar well say,
Thei worshepyd hymn of the xij. day.

Mary moder, mayden myld,
To the we cry, to the we call,
Thou be owre soeur and owre shyld,
Us thou save fro myschevys all.
Thou pray thi sonne, that prynce of pees,
Of all owre synnes he us relees,
Ou3t of this warld whane we shal cees,
With aye,
Aye, aye, so that we may
Wend with hym at domysday.