As I Up Ros In A Mornyng Lyrics

Modyr whyt as lyly flowr,
3owr lullyng lessyth my langour.

As I up ros in a mornyng,
My thowth was on a mayd 3yng,
That song aslep with hyr lullyng
Her swet son, owr Savowr

As sche hym held in hyr lape,
He toke hyr lovely by the pape,
And thereof swetly he toke an appe,
And sok hys fyll of the lycowr.

To hys modyr gen he seye,
For this mylke me must deye,
It ys my kynd therwith to playe,
My swet modyr par amowr.

The maydyn frely gen to syng,
And in hyr song she made mornyng,
How he that is owr hevyn kyng
Shuld shed hys blod with gret dolowr.

Modyr, thi wepying grevyth me sor,
But I wold dey, thu haddys be lor;
So awey, modyr, and wep no mor;
Thy lullyng lessyth my langowr.

Swych mornyng as the maydyn made,
I can not tell it in this howr;
Therfor be mery and glade
And make us mery for owr Savowr.