Welcome By Thys Blissed Feest Lyrics

O mervelous and blessed nativite off Goddes sonne in divinite.

Welcome by thys blissed feest
Off Jesu Christ in trinite,
That is reformer off owre reste,
Lovyng peace and charite.

In tyme off peace thys chyld was borne,
As it was shewed in prophicye,
To save mankynd that was forlorn,
Fore kyng off peace he is trulye.

Born mervelously he was,
Full off blysse and divinite;
And she a mayd never the leese,
And so was never noone but she.

In his byrth holy was knytt
God and man in his degre,
Moder and mayd together were sett,
Feith in mans hart ever to be.

Therfor praye we to that lord,
And to his moder mayden fre,
To mak us wisse in wark and word,
To praysse and plesse the Trinity.