Asha Bhosale - Galyat Majhya Tuch Jivalaga Lyrics

गळ्यात माझ्या तूच जिवलगा मंगलमणी बांधले
जन्मोजन्मीची सुवासीन मी तुझ्यामुळे जाहले
गळ्यात माझ्या तूच जिवलगा
दिसायला मी काळी सावळी मुलखाची लाजरी
नटणे सजणे या भोळीला ठाऊक नसता परी
तव नयनांचा
तव नयनांचा पाऊस अवचित पडला अंगावरी
वठल्या देही चैत्रपालवी कणकण मोहरले
गळ्यात माझ्या तूच जिवलगा

प्रीतीची तव खातर होऊन तुझ्याकडे धावले
जनरुढीच्या लोहशृंखला झाली जड पाउले
कुचाळकीची
कुचाळकीची आग पसरुनी उठता ही वादळे
हात देउनी तूच राजसा फुलापरी झेलले
गळ्यात माझ्या तूच जिवलगा

पाचूचा हा चुडा भरुनिया तुजभवती नाचले
आनंदाचे अश्रू उधळित सप्तपदी चालले
तूच दयाळा
तूच दयाळा सौभाग्याचे लेणे मज अर्पिले
अभागीनीच्या कुंकू कपाळी सख्या तुवा लाविले
गळ्यात माझ्या तूच जिवलगा मंगलमणी बांधले
जन्मोजन्मीची सुवासीन मी तुझ्यामुळे जाहले